Prouvènço Informations - PÈR LA MORT DE LOUISO MICHEL LOU 9 DE JANVIÉ DE 1905, À MARSIHO
PÈR LA MORT DE LOUISO MICHEL,
LOU 9 DE JANVIÉ DE 1905, À MARSIHO
De Marsiho, lou 11 de janvié de 1905
Adiéu, bràvi cousin,
A parti, la Vierge roujo.
Vuei, s’es enana pèr Sant-Pèire, lou gros cementèri de Marsiho¹, dins un bèu gourbeiard tout plen de flour… darrié, i’avié sabe pas quant de mounde (iéu que n’en manque pas uno, i’ère tambèn) e de drapèu, de bandiero, de parladuro, n’en vos ? n’en vaqui ! Lou rèire-maire Flaissières a fach uno charradisso que vous dise pas ! Entre lis un e lis autre, nous an tout di sus la Loubo, la Bono Louiso, la Vierge roujo, basto … Louiso Michel.
Aquelo d’aqui semblavo en degun. Nascudo lou 29 de mai de 1830 au castèu de Vroncourt, en Nauto Marno, anè is escolo pèr faire la mestresso… Coume vouguè pas faire sarramen à l’Empèri, creè uno escolo libro. Tres an à-de-rèng, i’ensignè segound li principe republican… ço que, segur, is autourita, i’agradè pas. S’istalè à Paris e ié rescountrè Jùli Vallès, Óugèni Varlin e Teoufile Ferré… soun grand amour, parèis ! En 1869, la veici secretàri de la « Soucieta demoucratico de mouralisacioun » qu’avié pèr toco d’ajuda lis oubriero. Un an après, quàsi au moumen de la Coumuno, la vaqui, elegido au « Coumitat de vigilànci di ciéutadan » de l’arroundimen 18 de Paris. E toujour, ensignavo. La bravo femo ! aguè meme l’idèio d’ourganisa uno cantino pèr sis escoulan !
Vèngue la Coumuno ! E nosto Louiso dins la batèsto de l’Hôtel de Ville, viestido coume un gàrdi naciounau ! De que faire mai ? Proupagandisto, gàrdi au 61en bataioun, ambulanciero… beilejo tambèn lou « Clube de la Revoulucioun ».
Vèngue 1871, l’an maudi ! À-n’elo, la detencioun pièi la depourtacioun en Nouvello Caledounìo. À sis ami – à l’ami Ferré – la mort. Dins un raport de pouliço de 1878, afiermon que la Louiso s’èro facho marca à l’Internaciounalo.
1878 : gramaci pèr elo ! Óutenguè lou dre de s’istala emai d’ensigna à Nouméa.
Venguè pièi, lou nouvèmbre de 1880 : tout un pople l’esperavo à Paris. À 75 an, cour la Franço : de Marsiho à La Ciéuta, de Draguignan à-n’Ourasoun. Quàsi morto, s’entorno à Marsiho : Bono Louiso i’acabè soun roumavage de santo laïco lou 9 de janvié.
Vaqui, bràvi cousin, ço qu’aviéu de vous dire, vuei.
Oudilo Delmas
¹ À quàuqui tèms d’aqui, la tournaran-sepeli au cementèri de Levallois-Perret.
_________________________________________________________