Nascu dins lis annado 1930 à 1970, erian mai fort !

Publié par Chorale ACANTARI sur 24 Juillet 2013, 16:22pm

          I’avié ges de sarraio i porto. Quouro fasian de velò, cargavian de casqueto e ges de casco de prouteicioun. Nòsti velò avien ges de fren e de lume nimai, e caminavian de vers l’oustau d’un coumpan de classo que nous aculissié simplamen : erian li bènvengu.
          Pipaudoun e pichot, nòsti parènt coundusien de vièi càrri sèns caufage, ni cencho, ni sèti pèr la ninèio, e sèns couissin d’èr. Èstre dins la begno arrié d’uno camiouneto pèr uno bello journado ensouleiado èro un chale !
          Bevian d’aigo à la font, de choucoulat emé de vertadié sucre. Manjavian de bescue, de pan assesi, de bon burre, de sahin, de ventresco. E pamens semblavian pas uno bouto.
          PERDEQUE ? Bord qu’erian toujours en trin de boulega, de jouga deforo…
        Avian ges d’esquicho boutoun, de telefounet barrulaire e de maium souciau nimai… avian d’ami e sourtian pèr carriero afin de li rescountra !
        De matin, sourtian de l’oustau pèr jouga la journado touto au grand èr. Toumbavian dis aubre, en fasènt lou paro-toumbant, se coupavian, se roumpian lou mourre, lis os, li dènt, … e pamens i’avié ges d’aciounamen contro. Nous semoundian de fusiéu à ploumb ; jougavian emé de bastoun, de paumo, de tiro-elastico, d’espaso, d’arc e de flecho, de flecheto ; fustejavian de radèu de fourtuno emé d’óutis riscous. Mandavian de petadou à mècho, tubavian de P4* à l’unita, chuchavian de longo de bouito de cocot ; is ouro li mai caudo, li bugadié èron nòsti mai bèu nadadou.
         L’idèio que nòsti gènt aurien un jour à nous faire sourti de presoun èro pas pensable. Èron EMÉ la lèi. Que sarien contro l’avejaire de l’ensignaire, dóu proufessour, dóu poulicié, dóu gendarmo, dóu conse, dóu capelan, que poudien n’en veni à se tabasa vo à se dire d’escorno èro pas poussible !
       Avian la liberta e la pòu de fali, la reussido e li respounsableta que ié van emé, mai avèn apres coume mena tout acò. Coume la vido èro bello, lindo, de fes que i’avié rudo mai quant erian urous !

* Li P4 èron de cigaleto, li Parisenco vendu en paquetoun de 4.

Martino Bautista

[Provençal] Nascu dins lis annado 1930 à 1970, erian mai fort !

Afin d'affirmer son soutien à la langue provençale et à son enseignement au plus grand nombre, GénéProvence publiera une fois par mois un article sur la Provence d'hier dans les deux langues :...

http://www.geneprovence.com/provencal-nascu-dins-lis-annado-1930-a-1970-erian-mai-fort/

Un article intéressant de l'excellent blog Généprovence