Prouvènço Informations - LA CANDELOUSO À MARSIHO
LA CANDELOUSO À MARSIHO
Cinq ouro de matin, lou 2 de febrié. La fre fendiho li bouco, li det s’escarton.
Davans l’antico abadié Sant-Vitour de Marsiho, tout un pople crestian, fervourous – de vièi e de pas tant vièi emai de jouine, n’en vos ? N’en vaqui ! - i’es acampa pèr celebra la Candelouso. La Candelouso, disès ? À l’óurigino, celèbro autant la purificacioun de la Vierge coume la Presentacioun de Jèsus au Tèmple.
Legèire, moun ami, te n’en souvènes : tout coumencè i premié tèms de la Glèiso, souto lou Papo Gelase 1é (492-496) e soun noum, « Candelouso », ié vèn di cire qu’ausson vers lou cèu lou pople coume lou clergié, lor de sa proucessioun. Venguè pièi lou Papo Celestin III : pèr uno Bulo dóu 3 de juliet de 1195, coungreiè la counfrarié de Nosto Damo de Counfessioun. Es elo, N.D. de Counfessioun, la Vierge negro – bruno dóu fum di cire – que, pèr l’óucasioun, tiron de la croto de Sant-Vitour. Es aqui que benisson li cire verd (verd coume lis anti sagèu vitouren) – li que, se dis, aparon dóu tron.
Cinq ouro de matin. Autre decor : lou Port Vièi. Meme pople. Naut, bèn aut, tout contro lou cèu, lèvon li flameto di cire. Espèron…
Espèron N.D. de Counfessioun que, de Sant-Vitour, caminara sus d’espalo jouino e roubusto. Au Port, reçaupra lis Evangèli vengu de la mar, coume, à tèms passa, n’en venguèron li coumpan de Crist…
Vuech ouro de matin. Davans lou vièi Four di Naveto¹. Lou mounde se caucigon lis artèu. Cadun, caduno s’entorno, un saquetoun dins la man… autant d’oustau mounte se tastaran li naveto – pichòti nau de bescue – evoucacioun d’un tèms, se dis, que tres sànti femo, li tres Marìo – Madaleno, Jacobe e Saloumè – naufragié d’uno nau sènso aubre e sènso remo – evangelisèron Prouvènço.
¹boutigo e four soun li mai ancian de Marsiho… es lou boulangié Aveyrous, foundadou dóu Four en 1781, que creè la « Naveto » à l’image de la barco di coumpan de Crist.
Oudilo Delmas
_________________________________________________