Peireto Berengier : Louis-Agricòu Montagné

Publié le 12 Février 2013, 02:12am

MARSYAS 2: Peireto Berengier : Louis-Agricòu Montagné

.Louis-Agricòu Montagné (1879 – 1960)Un pintre à Castèu-nòu de GadagnoLouis Montagné, soun paire èro representant e fuguè abarri dins uno famiho que ié voulié faire estudia lou dre. Pamens, de tout jouinet, moustrè qu’èro fa pèr la pinturo e lou dessin. Pau Saïn lou remarquè qu’èron vesin. Louis Montagné lou seguiguè à Paris ounte rintrè lèu dins la bono soucieta e troubè sa bello plaço dins li mitan artisti. Proun sucès dins li saloun afourtiguèron sa noutourieta e daverè de bourso pèr viaja à l’estrangié, en particulié en Itàli.En 1903, partiguè pèr l’Africo dóu Nord sus li piado d’impressiounisto coume Aubert Maquet.En 1907, lou museon Calvet ié croumpè uno de si peto li mai grando : « Le Fort Saint-André ». Plus tard fuguè dóu nouvèu group dis artisto regiounau e dóu group di Trege ounte couneiguè en particulié l’escultour Pèire Gras, fiéu dóu capoulié.Dóu tèms de la guerro, èro dins lou 118en RI e trevè li vilage arrouina. En Champagno reçaupeguè uno estello d’aubuso à la tèsto e perdeguè un iue. Pamens avié crouca sus lou viéu la vido vidanto de la guerro dins li trencado. Si dessin soun serva au Musée des Invalides à Paris.En 1921 fuguè nouma direitour de l’Escolo di Bèus-Art d’Avignoun. Dès an plus tard, à Paris, rescountrè lou coumandant Charcot que lou menè pièi dins uno espedicioun poulàri sus lou Pourquoi pas. Ero un ilustratour e un pintre celèbre que fasié tambèn dins l’edicioun e la decouracioun. Pintre de la naturo, s’interessè peréu à la vido di campagno e i dedins d’oustau. Lou Museon Vouland d’Avignoun, ié rendeguè un bèl óumage en 2010 emé soun espousicioun « Intimités provençales ». Ero un mèstre di formo e sa toco di mai delicado dins lis aquarello. Membre de la Coumessioun di Site e Mounumen Istouri trevè tóuti li regioun de Franço. Ié devèn la decouracioun d’uno partido dóu Train Bleu, lou famous restaurant de la garo de Lioun, à Paris. D’aiours, soun noumbrous lis artisto prouvençau que decourèron aquesto garo.Proun endrudi e nouma Counservatour dóu museon de Vilo-novo d’Avignoun, Louis Montagné se croumpè lou doumaine de Pontmartin is Anglo e d’aro en lai partajè sa vido entre soun oustau e Paris ounte defuntè lou 12 de febrié 1960. Ero óuficié de la Legioun d’ounour despièi 1932.La revisto municipalo de Castèu-nòu-de-Gadagno ié counsacrè un bèl article ilustra dins soun numeròde juliet 2012. Nous laisso noumbre de pinturo, aquarello e dessin forço presa dins li galarié e lis encan.Louis-Agricòu Montagné, un pintre que lou devèn counèisse e presa.Peireto Berengier.

http://marsyas2.blogspot.com/2013/02/peireto-berengier-louis-agricou-montagne.html

Louis Agricol Montagné - Wikipédia

http://fr.wikipedia.org/wiki/Louis_Agricol_Montagn%C3%A9

Pour en savoir plus